Sikoloji se yon disiplin ki konsène nan fè evalyasyon ak dyagnostik pwoblèm ki gen rapò ak panse, santiman epi konpòtman. Li la tou pou li ede moun konpran n, jere ak domine pwoblèm yo. 

Yon SIKOLÒG se yon moun ki etidye sikoloji, li pa yon medsen, ni tou yon sikyat ki etidye medsin epi espesyalize nan sikyatri. 

KILÈ POU W ALE WÈ YON SIKOLÒG ?

Anpil bagay ka pouse w ale wè yon sikològ, tankou:

• Pwoblèm sante mantal, tankou depresyon, perèz, anksyete, elatiye;
• Pwoblèm devlopman ak konpòtman ;
• Konsomasyon alkòl, tabak ak dwòg ;
• Pwoblèm nan relasyon koup, pwoblèm fanmi, separasyon;
• Pwoblèm sikolojik ki asosye ak on seri de maladi fizik, tankou dyabèt, maladi kè, tansyon, maladi serebral-vaskilè ;
• Konpòtman kriminèl; pou m site sa yo sèlman.  

Konsiltasyon kay yon sikològ  nesesè, enpòtan lòske twoub lakay moun nan anpeche l gen yon vi sosyal ki satisfè l. Sa konsène tou relasyon pwofesyonèl yo tankou pèsonèl yo. Epi, ou pa bezwen yon preskripsyon pou voye w al wè yon sikològ, ou ka anvi pale sèlman, ou deside al wè yon n. 

KI TRAVAY SIKOLÒG LA FÈ ?

Pandan seyans yo, sikològ la analize sitiyasyon yo pou l sa jwen n twoub yo epi konseye moun nan sou ki tip èd sikolojik ou sikoterapi l ap bezwen. 

Yon sikològ ka travay nan plizyè estrikti, tankou lopital, biznis, endistri, sant rayabilitasyon, klinik prive, prizon, lekòl , elatriye. 

Wòl li se koute, sèvi konpanyen et bay swen. E pou sa, sikològ la :

• Ap bezwen pale ak moun nan, poze li kesyon sou rezon ki fè li vi n konsilte, pou l sa pi byen konpran n epi fè istwa moun nan. 
• Li ka pase moun nan tès sikolojik tou, poul pi byen konpran n sakap travèse pasyan an epi a ki nivo ou degre li afekte. 
• …. 

Li enpòtan pou w konsilte yon sikològ, lè w santi w manke resous, lè w santi w fèb, lè w santi w dekouraje, ou pa wè anwo w – w pa wè anba. 

Li enpòtan pou w konsilte on sikològ, lè w santi w tris epi w pa gen konfidan, yon sikològ se pi bon konfidan w ka gen nan lavi w. Li p ap jan m pale koze w.

Li enpòtan pou w konsilte yon sikològ, paske EKILIB manta l ou enpòtan pou wou, e se travay li pou l ede w nan sans sa.  

SONJE estrès, depresyon, angwas, ak lòt twoub yo ka gen gwo repèkisyon sou lavi nou, sou fonksyonman chak jou nou. Yo ka ran n nou enkonfòtab, fè nou santi nou mal nan yon pwen yo afekte randman travay nou, lekòl, fanmi ou pèsonèl. 

SONJE pwoblèm sa yo ka men m pwovoke sentom fizik, tankou gwo tèt fè mal, doulè nan manm yo, sansasyon etoufman, tèt vire, batman kè, elatriye. 

SONJE si w te twomatize pa yon evenman kèlkonk, ki ka vòl, atak ak zam, vyòl, aksidan, asèlman, agresyon seksyèl, sikològ la ka ede w travèse moman difisil sa yo. 

SONJE si w anvi pote on seri de chanjman nan lavi w, paske anpil rezon ka pouse w pote chanjman nan lavi w, sikològ la la pou sa. 

SONJE difikilte yo pa sèlman kòz ki ka pouse w pran yon randevou, men anpil moun kon n bezwen bay lavi yo yon sans nan dekouvri ki moun yo ye tout bon. Se djòb sikològ la pou ede w. 

Pa ezite kontakte KABINET SIKOLOJIK AK BYEN-ÈT WILOCOX TOYO pou tout sipò sikolojik. 

Wilcox TOYO